ZAMBOANGA CITY – Umabot sa dalawang kilo ng crystal meth o shabu na tinatayang nagkakahalaga ng P13.6 milyon, ang nasamsam ng mga operatiba ng Philippine Drug Enforcement Agency (PDEA) sa inilunsad na joint anti-narcotics operation sa Barangay Talisayan, Zamboanga City.

Sa ulat na ipinarating sa tanggapan ni PDEA Director General USEC Isagani Nerez, nagsagawa ng buy-bust operation ang kanyang mga tauhan sa pangunguna ng PDEA Regional Office IX (PDEA RO9), na nagresulta sa pagkakadakip sa itinuturing na high-value target at nasamsam ang dalawang kilograms ng hinihinalang shabu sa Barangay Talisayan, nitong nakalipas na linggo.

Kinilala ang nadakip na drug personality na si alyas “Gamar,” 41-anyos, tricycle driver at naninirahan sa Isabela City, Basilan.

Ang joint operation ay inilunsad katuwang ang PDEA RO9 Isabela City Office, PDEA RO9 Zamboanga City Office, PDEA RO9 Seaport Interdiction Unit-Zamboanga City, at PNP RMFB9.

Kabilang sa nasamsam sa anti-illegal drug operation ang hinihinalang shabu, caliber .40 pistol, boodle money, at iba’t ibang drug paraphernalia.

Nahaharap ang suspek sa kasong paglabag sa RA 9165 at RA 10591.

(JESSE RUIZ)